حملة ضد

السلام عليكم ورحمة الله وبركاته

ديه فكرة جديدة لمواضيعنا في المنتدى عشان تكون مش مؤثرة بس في حياتنا , لكن مؤثرة في الأمة كلها . وده مش بعيد خالص ان البداية تكون من منتدى صغير ومكان متواضع زي ده

الفكرة ان احنا كل فترة هنعمل حملة ضد حاجة معينة حاسين انها لازم تتغير في حياتنا لكن مش قادرين , او محتاجين حد يساعدنا ويشجعنا
وهنبدأ ننشر الحملة ديه في كل مكان في المنتدى او خارج المنتدى لغاية ما صوتنا يوصل للناس كلها , وبعدين نبدأ حملة جديدة ضد حاجة جديدة

وأول حملة حبيت اني انظمها

عنوان الحملة

عرّب حياتك


شعار الحلمة

وكم عز اقوام بعز لغات


صورة الحملة



ماذا عن الحلمة

بصراحة انا شفت شعوب كتير, ولاحظت ان كل اللي اتعاملت معاهم بيعتزوا بلاغتهم اوي ,

يعني لا قيت الألمان كلهم شغالين على ويندوز الاماني ولاقيت اليبانين كلهم شغالين على ويندوز ياباني , والصينين كلهم بدون استثناء شغالين على ويندوز صيني - رغم ان اللغة الصينية لغة قديمة جدا ولا يمكن ان تكون لغة رقمية -
ولكن عمري ما شفت شخص عربي بيشتغل على ويندوز عربي , مش عشان هو مثقف وبيعرف انجليزي كويس ,,, لا
للاسف عشان بيكسف يشتغل على ويندوز عربي
وانا واحد من الناس ديه , اللي عمري ما فكرت انزل ويندوز عربي , ويمكن لو كنت شفت حد بيستخدم ويندوز عربي كنت هتريق عليه

لكن بصراحة لاز نرجع تاني للغتنا , وطبعا بما ان معظمنا اصبح من شباب الانترنت , كان لا بد للبداية ان تكون من هنا , من امام هذه الشاشات

وانا اول واحد قررت اغير , وفعلا غيرت وبكتب الكلام ده من ويندوز عربي , والموضوع ما كلفنيش وقت كتير غير 10 دقايق بس

كل اللي عملته اني حملت الملف ده




شرط الحلمة

ان ما حدش يكتب كلام عربي بحروف انجليزي, ايا كان العذر

كلمتي عن الحملة

هقولها بعد ما اشوف رأي الأعضاء

شكرا يا جماعة على كل الردود اللي انتو ردتوها , وبجد انا متشكر جدا على تأييدكم ليا رغم صعوبة الموضوع اوي

وعلى فكرة يا رغدة كلنا اتعودنا على الكمبيوتر بالانجليزي , وصعب جدا اننا نغيره , وانا عمري ما توقعت اني اشتغل على كمبيوتر عربي خصوصا ان المصطلحات العربية في الكمبيوتر مش منهجية ومش صحيحة , لكن والله لو حاولنا هنقدر, وممكن كمان يبقى على ادينا اول تغير جذري في لغتنا وفي مستقبل لغتنا , وانا شايف انها خطوة مهمة جدا اننا نبدأها من الكمبيوتر.
بس انا على فكرة موقف الكلام في الحملة ديه دلوقتي لغاية ما اخلص امتحانات, لكن بعد كدة هشجع الموضوع اوي وهعمل كل اللي بوسعي عشان اوصل الفكرة ديه

وطبعا يا رغدة كلنا معتزين بلغتنا جدا لكن للأسف كلنا بنبعد عنها وبنجيد لغات تانية اكتر منها
وعلى فكرة (ض) بتكتب كدة : ضاد

يا رغدة انا عشان ارد عليكي في النقطة ديه , لازم ارد بتوسع جدا وهيكون الرد طويل اوي وممل عشان اقنعك 100% بفكرتي
لكنت انا هرد عليكي رد بسيط جدا , وممكن بعدين لما افضى شوية من الامتحانات ابقى ارد رد طويل واتوسع فيه زي ما انا عايز

بصي يا رغدة , في طرق كتير جدا احسن من الطريقة ديه تخلينا نرجع للغتنا , ونتقدم جدا , وفعلا مش معنى اننا عملنا الكمبيوتر عربي يبقى احنا كدة خلاص اتقدمنا,
لكن انا عمري ماكنت هقدر افرض على كل واحد انه يتكلم باللغة العربية الفصحى عشان يقوي لغته العربية , ولا اقدر اطلب من حد انه ياخد كورسات عربي عشان نسترجع اللغة العربية في كلامنا. ولا ينفع انادي بتغير مناهج العربي في المدارس ووضع مناهج مفيدة
لكن ديه الحاجة الوحيدة اللي كنت ممكن اتوسل من الناس انهم يعملوها - انهم يحاولوا يستخدموا الكمبيوتر بالعربي -, لان ديه احسن طريقة واكثرهم افادة
---
احنا طبعا كلنا درسنا انجليزي في المدارس , وخدنا كلمات ممكن تفيدنا اننا نكلم بيها
والكلمات اللي اخدناها في المدارس كانت مثلا apple - school - engineer - teacher - eat

مش هي ديه برده الكلمات اللي احنا كنا بناخدها في المدارس من واحنا صغيرين
لكن عمرنا ما قلنا انا جعان اوي وعايز eat
ولا عمرنا قلنا انا نفسي اكل apple
ولا قلنا انا بابا شغال engineer

لكن في المقابل كلنا بنقول
افتح الـ folder ده
اعمل للملف ده delete
افتح الـ control panel
ابعتلي الـ link بتاع الموقع
وحاجات كتير تانية احنا بنقولها كل يوم
وكل ديه مصطلحات احنا بنشوفها في الكمبيوتر بس

معنى كدة ان تأثير المناهج اللي احنا بندرسها على كلامنا يكاد يكون 0%
لكن تأثير شغلنا على ويندوز انجليزي يعدي الـ 90%

ومن هنا ظهرت أهمية استخدام واجهة الكمبيوتر في التأثير على لسان الشعب ديه اول نقطة .

تاني نقطة , اني قلت ان اللغة العربية في الوينودوز مش منهجية ومش صحيحة, والسبب في كدة ان العملية عرض وطلب, والناس كلها شايفين العرب بايعين القضية , ومش عايزين الكمبيوتر يبقى بلغتهم- اللي هو اكتر جهاز بقينا بنتعامل معاه في اليوم - فاكيد عمرهم ما هيعملوا ويندوز عربي 100%
لكن لو احنا زاد طلبنا على الويندوز العربي هيزيد الاهتمام , وشوفي بقى ايه اللي هيحصل

-اولا هيزيد الطلب والاهتمام بالمبرمجين العرب , اللي هم عقولهم اصلا خارقة بس عايزين حد يساعدهم , وكدة هتكون جاتلهم المساعدة وهياخدوا فرصتهم.

-ثانيا ممكن تتحول لغة البرمجة للعربية , زي ما اتحولت لليبانية والصينية بعد ما زاد الطلب عليها , مع انه كان شئ مستحيل, ولو اتحولت لغة البرمجة
للعربية , يبقى كل حاجة هتتطور في حياتنا لان كل حاجة دلوقتي من ابسط حاجة لاهم حاجة معتمدة على البرمجة .


ثالثا بما اننا عندنا عقول عربية رهيبة , ده اكيد هيخلينا نبدع ونتميز في حاجات كتير جدا لو اعتمدنا على لغتنا 100%, وكدة هنجبر ناس كتير اوي انهم يتعلموا لغتنا عشان يقدروا يستفيدوا مننا , وديه اهم نقطة اننا نعرض بيها ثقافتنا ومبادئنا على الشعوب الأخرى ونبدأ احنا اللي نأثر فيهم مش هم اللي يأثروا فينا

وفي حاجات تانية كتير اوي , ممكن افضل اكتبلك 10 ساعات عن فايدة الفكرة ديه , ومش هخلص برده كلام .
لكن كفاية دول دلوقتي , وياريت لما نفكر في حاجة من نبصلهاش من اضيق زاوية ... المفروض ندور على اوسع زاوية ونبص منها , عشان نعرف نبص لبعيد اويييييي

يارب تكون فكرتي كدة وصلت ,واسف عشان طولت عليكم في الكلام وانا عارف اني ممل واحتمال اكون زهقتكم , بس اروجوا انكم تكونوا اقتنعتم
لان بجد اللي خلانا ورا اوي كدة , اننا بعدنا عن لغتنا وعن دينا , وموضوعنا دلوقتي لغتنا , ياريت نحاول نرجعلها ومانفتكرش الموضوع بسيط ومش مهم
ومانقولش فيها ايه لو استخدمنا الكمبيوتر بالانجليزي , او فيها ايه لو اتنازلنا عن لغتنا في التكنولوجيا والتطور ومواكبة العالم الجديد, لان ما حدش بيعمل كدة غيرنا.

وعلى فكرة انا بحب اللغات جدا , وبعشق دراسة اللغات, ونفسي اتقن لغات كتير, لان فكرتي ديه ما بتعارضش اني اتعلم اللغات التانية واتقنها....