تاثير اغنية الضمير العربى عليكم

من طرف وردة المنتدى الجمعة مارس 28, 2008 5:39 pm

الموضوع ده عبارة عن ان كل واحد فيكم يقول لما سمع اغنية الضمير العربى عمل ايه يا ترا ضميره صحى وفاق عن اللى بيحصل فى العرب واحنا هنا قاعدين فى بيوتنا ولا حاسين باى حاجة يا ترا فوقنا من الغيبوبة ولا لسه فيها شوفتوا عاملين ايه فى بلاد المسلمين واحنا ولا نعرف بجد انا اكتشفت ان ضميرنا كان ميت والاغنية دى صحته ياريت اعرف رد كل واحد فيكم

من طرف I_AM_LEGEND الجمعة مارس 28, 2008 6:06 pm

شكرا على الموضوع , وشكرا انك فتحتي نقاش زي ده
وانا عايز اقول رأيي وانا عارف انه مش هيعجب ناس كتير , او مش هيعجب حد خالص , بس طبعا لازم اقوله

اولا مع احترامي لكل الاراء اللي اتاقلت عن الاغنية , واحترامي لكل الناس اللي هتقول رأيها
فانا بعتبر ان الأغنية ديه أسوأ أغنية سمعتها في حياتي . وبصراحة ما لهاش أي لازمة , ولا هتعمل أي حاجة ولا هتغير أي حاجة مع انها كانت ممكن تغير وكانت ممكن تحركنا وتفوقنا شوية
زي ما عملت أغنية الحلم العربي , وكانت ليها سبب كبير في نشأة الانتفاضة الفلسطينية , -صحيح كان في خذلان كبير من العرب في الانتفاضة ولكن الخذلان كان على مستوى الحكومات- لكن على الاقل حركت الشعوب مش مهم بسلاح ولا حاجة , لكن المهم انها حركت قلوبنا وتعاطفنا وفعلا كانت في مظاهرات واعتصمات واعتراضات ايام الحلم العربي
بل كمان في تقارير صحافية كتير اتعملت , وكان كل الشباب في الوقت ده بيقول احنا نفسنا في حرب , ونفسنا يفتحولنا باب الحرب والجهاد , عشان نسترد ضمير الأمة المهدور , وكان فعلا الكل مستعد يحارب , ولو كان اي شاب ساعتها اتفتحله باب انه يدافع عن الضمير العربي, ماكانش هيتوانى ابدا وكان هيدافع وكنا فعلا هنبين للكل الناس اننا رجالة ونقدر نرفع الامة ديه
ولكن للأسف ايضا احبطنا الحكومات وليس الشعوب

طيب طالما كدة

فليه الحلم العربي كانت ناجحة من وجهة نظري والضمير العربي فاشلة أيضا من وجهة نظري المحدودة جدا

الحلم العربي ناجحة لانها كانت أغنية فعلا مثالية , كلماتها بتبين الطموح , واننا قادرين نوصل وقادرين نحقق ونقدر نتوحد ونقدر نبقى أحسن الشعوب ونقدر ونقدر ونقدر.......
وده اللي ادى الدافع للشباب كله انه يكون مستعد لحرب ايا كانت النتيجة , لانه حس انه فعلا يقدر وانه فعلا قدها (((وهو ده المطلوق)))
ومن ناحية الفيديوا , كان رائع جدا ولقطات رائعة جدا , --- ليه ؟؟؟؟... لان معظمها كان بيوضح قوة شجاعة الشاب العربي وجبن الجندي الاسرائيلي , يعني مثلا شاب بيجري ورا دبابة , راجل بيضرب جندي إسرائيلي لانه مد ايده على إمرأة واحد صاحبه اضرب قدامة ومارضاش يهرب ويسيبه , لكن وقف معاه وشاله وماخافش من حاجة
أم بتجري ورا جندي ومش خايفة منه , وهكذا
وده بين للشاب العربي قد ايه الشعوب ديه جبانة وضعيفة جدا , ورغم السلاح اللي معاها فاحنا قدها واقوى منها كمان
لكن ناقصنا بس حكومات نظيفة , عشان كدة كله كان متحمس وكله كان بيتحرك

لكن نيجي بقى للضمير العربي , اولا كلماتها , بتبينلك قد ايه احنا ضميرنا ميت , وقد ايه احنا متفرقين ومفتونين , وضعاف , وان الشعوب كلها بتستغلنا , واننا مش قادرين نحقق حاجة , وان الحلم الاول ما اتحققش عشان احساسنا مات , واننا بنتهان وبنسكت و و و و .....
وده طبعا من أشد أنواع الاحباط , اللي خلى الشاب بدل ما يقول عايزين حرب , يقول ياريتني ماكنت عربي ,عشان اعرف اعيش بكرامة , لانه حس ان خلاص احنا مالناش رجعة , وكانت النتيجة انه اتأثر جدا جدا جدا بالكلامت ولكن قعد في البيت يائس جدا ومحبط جدا وحس ان خلاص عمرنا ما هنعرف نعملهم حاجة

أما من ناحية الفيديو , فهو أسوأ ما في الأغنية -بصراحة انا ما رضيتش اتفرج عليه , بس شفت منه لقطات بسيطة-
مش جايبين اي مظهر قوة للعرب , لكن موضحين قد ايه قوة الجندي الإسرائيلي وقد ايه بيهينونا وبيعذبونا
بالله عليكم لما الشاب العربي اللي هو أصلا كل حاجة حواليه بتحبطه , لما يشوف واحد بيكهرب , وواحد بيضرب على وجه من جندي يهودي حقير وبيتهان ومش عارف حتى يتحرك ولا يرد كرامته , لما اشوف واحدة كلب بيجري وراها وماحدش عارف يدافع عنها , لما اشف أم بتتهان وابنها واقف متكتف ومش عارف يعمل حاجة , كل اللي بيعمله انه يتفرج على امه وهي بتتهان ,
لما يشوف اب قاعد بيتعذب قدام ولاده ومش عارف يتحرك , لما يشوف طفلة جالها حالة عصبية , لما شافت كل عائلتها مقتولة قدامها ومش عارفة تعمل اي حاجة , لما يشوف ,,,, ويشوف ,,,,,, ويشوف الحاجات ديه كلها
بالله عليكم هيبقى حاله عامل ازاي ,

كله اللي هيحصل انه هيجيله حالة احباط وخوف

وهيقول جملة واحدة ,,,

الله يرحمك ياسدات عشان معاهدة السلام , كان زمانا دلوقتي زيهم .
وهينسى ان دول شعب مننا وانه جزء مننا , واننا اللي بنتهان باهانهتهم

ولا هيفكر في حرب ولا هيفكر في حاجة ,
هيروح يكمل قعدته على القهوة ,او يلعب بلاي ستاشين ويحاول ينسى كل اللي هو شافه , ويقول الحمد لله اننا عايشين في سلام
وخلصت الحكاية , والاغنية ولا عملت حاجة

انا بعتذر على الاطالة
وبعتذر لو كان رأيي ضايق حد

من طرف وردة المنتدى الجمعة مارس 28, 2008 6:27 pm

بس الاغنية دى بتبين ان العربى ضعيف ماشى بس لما الناس تشوف حاجةزى دى الناس هاتفوق زى ما شافوا محمد الدرة الدنيا كلها انقلبت بس الهدف من الضمير العربى ان ضماير الناس تصحى مش بس المقصود فى الاغنية دى المصرى بس مقصود بيها العالم العربى كله انه يتحد ويعمل اى حاجة يساعد بيها الدول المحتلة مش لازم الحرب بس معونة اى حاجة من دى والهدف من الصور دى انهم بيقولولنة ان احنا فى يوم من الايام هانبقى زى الدول دى وهايحصل لنا زى ماحصلهم واكتر

من طرف Alaa_ZaKi الجمعة مارس 28, 2008 9:30 pm

بجد بشكرك اووووووى يا وردة على طرحك لهذا الموضوع

وانا مع رائ احمد لان بجد الضمير العربى حبط نفوس الشباب على ان ماتت قلوب الناس ماتت فيهم النخوه

دة مش كلام ليفعل همه الشباب وقوتهم

وبعدين الضمير العربى متقلش باحساس زى الحلم العربى

من طرف raghda_hassen الجمعة مارس 28, 2008 11:35 pm

انا بجد اتأثرت جدا بالاغنيه دى لدرجه حالتى النفسيه كانت وحشه وصحابي كانو بيسالونى مالك ومكنتش بعرف ارد عليهم
الاغنيه بجد شتت فكرى هى اة فيها مناظر رهيبه بس بجد مش القصد منها الاحباط بالعكس
عايزة تصحى ضمرنا وان دول اخوتنا الاشقاء لازم نبقي يد وحده
بس اكتر حاجه اتأثرت بيها (عزرا يا رسول الله)
بجد تعبتنى نفسيا جامد اوووووى ونفسي نبقي ايد واحدة لان الاستقلال والسلام مش هيجى غير لما نتحد
وشكرا يا وردة على الموضوع دة

من طرف I_AM_LEGEND الجمعة مارس 28, 2008 11:36 pm

ربنا يخليكي يا الاء , انا كنت فاكر ان كله هيعترض على رأيي, بس كويس ان في حد شايفها من نفس الزاوة اللي انا شايف منها
والاغنية أثرت فيه نفس التأثير اللي أثرته فيا

طبعا ياجماعة انا كلامي ده مش معناه اني بتمنى ان الاغنية تحبط الشباب, لا طبعا انا بتمنى ان الشباب كله يفوق ويتحمس , ويارب الضمير العربي فعلا تعمل فينا حاجة , احنا دلوقتي بقينا متسكين باقل حاجة , ممكن تحركنا او تفوقنا

من طرف I_AM_LEGEND الجمعة مارس 28, 2008 11:46 pm

والله يا جماعة انا حاولت اشوف الحلم العربي تاني دلوقتي عشان احسس الاحساس بتاع ناس كتير , واحس انه فعلا ممكن يأثر في اثر ايجابي , بس للإسف ما قدرتش اتفرج عليه للمرة التانية , وفعلا الاجزاء اللي شفتها جابتلي احباط اكتر واكتر

لكن بجد أجمل كلمة اتقالت في الاغنية , واللي كان نفسي الاغنية كلها تمشي بنفس النمط ده , هي ديه :::
http://www.zshare.net/audio/96989866c648f3/

وانا على فكرة مسحت الاغنية كلها دلوقتي , وسبت الجزء ده بس

من طرف Maha Hegazy الجمعة مارس 28, 2008 11:57 pm

انا معاك يا احمد ان الكليب صعب اوووووووى بس هما يمكن نقلولنا الصوره دى عشان
يفهمونا اننا محتاجين نبقى جنب بعض اووووى ومحتاجين نساعد بعض عشان نوصل للى احنا محتاجينه
ويمكن كانوا فاكرين ان لو جابولنا صور البطولات يبقوا بيضحكوا علينا لان بجد الاعمال البطوليه دى
من العرب ...... واحد فى المليون من اللى بيتعمل فينا ومش دا الرد اللى ممكن ياثر فيهم اوى يحركهم
فكانت الفكره فى الاغنيه مش الاحباط لا طبعا ... الفكره هى ابتزاز المشاهد عشان يحس اد ايه الشعوب دى لوحدها
وفرحتنا بعمليه انتحاريه او اكثر مش هو دا الحل
وعلى فكره انا البنت اللى فى الكليب دى اكتر حاجه اثرت فيا وبجد خلتنى عيط اوووووى لانها حسستنى بكلامها بالظروف اللى هما عايشين فيها ... واد ايه الشعوب دى محتجانا جمبها

من طرف وردة المنتدى السبت مارس 29, 2008 12:01 am

بس مش الجزء ده بس اللى مؤثر ولا الكلمات دى بس فيه البنت اللى لقت كل اسرتها ميتة تحت الانقاض فى لقطات كتير اوى وفى الطفل اللى بيغنى فى الاخر عشان الناس تحس وتجتهد الاغنية مليانة كلمات مؤثرة كتير وانا واغلبيت اصحابى لما بنسمعها ضميرنا بيصحه وبنعيط كل الناس مهتمة جدا بالاغنية دى بس مش الهدف منها الاكتئاب لكن الهدف منها ان احنا نتعلم نحس بغرنا ونعرف ان هايجى يوم ونبقى زيهم

من طرف I_AM_LEGEND السبت مارس 29, 2008 3:26 am

فعلا ياوردة , احنا ما ننكرش ان الاغنية فيها حاجات مؤثرة -لا ديه كلها مؤثرة- , بس انا اللي بكلم فيه النتيجة اللي احنا هنوصلها بعد التأثر ده , هتبقى ولا حاجة غير احباط , لان من أهم فنون الحرب اللي بتتبعها أي دولة عايزة تنتصر حتى لو كانت ضعيفة , انا تبين قد ايه هي قوية وتستعرض قوتها قدام الاخرين وقدام افرادها , وده اللي بيزود الحماس اوي

وللأسف ان اللي عالم البشرية كلها النقطة ديه هم المسلمين

لو قرأتي او سمعتي قبل كدة عن غزوة مؤتة , أغرب وأعجب الغزوات

هتلاقي ان المسلمين بدأوا الغزوة بـ 3000 فقط , وكان الروم 100000 ألف وانضم ليهم 100000 غيرهم , يعني 200000
, طبعا المسلمين لما عرفوا الخبر ده قرروا انهم يتراجعوا ويبلغوا الرسول -صلى الله عليه وسلم- واتأكدوا انهم مش هيقدروا يدخلوا الحرب, ولكن بعد ما دخلوا وبدأوا الحرب واستشهد القائد-زيد بن حارثة - وبعده جعفر بن أبي طالب وبعده عبد الله بن رواحة
مسك الراية أعظم مخطط للحروب في التاريخ -خالد بن الوليد-

وطبعا موقف لايحسد عليه , 3000 مات منهم عدد كبير , ومقابل 200000 , موقف صعب جدا وخلاص الامر كان محسوم لصالح الروم من حيث القوة والعدد , وكل حاجة

لكن خطة سيدنا خالد كانت ايه ؟

انه غير صفوف الجنود واتجاهاتهم , عشان يفاجئ الروم بوجوه جديدة , وخلى الفرسان اللي في اخر الصفوف , يصدروا اصوات , عشان يحسس الروم -مجرد احساس- ان في وقود جديدة قادمة , وان في امدادات جاية من المدينة , وبكدة أظهر قوة المسلمين

رغم ان المعركة كانت لصالحهم , ولكن لما اتخدعوا في قوة المسلمين اتراجعوا وضعفوا وخافوا , وكان النصر في الاخر للمسلمين

انا اسف لو كنت خرجت عن الموضوع خالص , بس انا بحكيلك كدة , عشان تعرفي ان اهم خطوة للنجاح ,هي انك تجبري الاخرين على انهم يخافوا من قوتك حتى لو انتي ضعيفة جدا

لكن اغنية الضمير العربي , بتورينا وبتوريهم اننا فعلا ضعاف اوي , بنضرب وبنسكت , بنتهان والحكومات نايمة ولا حاسة بحاجة
بنتعذب وما بنقدرش نكلم , واننا مش هنتحرك مهما حصل ,

وده طبعا هيعرفهم قد ايه احنا ضعاف
وكمان هيعرفنا قد ايه احنا فاشلين

عشان كدة انا بقول انها اغنية فاشلة وبتحبط و

وانا بحترم طبعا وجهة نظرك جدا وبتمنى انها تحرك كل الناس وان اللي انا شايفه وبفكر فيه ده ما يحصلش

من طرف alaa السبت مارس 29, 2008 12:51 pm

سبحان الله انا كنت لسه بقول الرأي ده يا أحمد من يومين في محاضرة والدكتور كان رأيه زي رأيك بالظبط إن الأغنية لم تحقق أي تغير وفشلت في إقناع الشعوب العربية انا مش هقول رايه بصراحة لانه كان طويل جدا بس مجمله إن الاغنية فشلت في تحقيق هدفها بسبب تركيزها علي أبراز الضعف العربي فبالتالي أدت إلي إحباط الشباب
وكمان صعوبة المشاهد في الأغنية جعلت الكثير من الناس لم يكملوا الأغنية وانا واحدة منهم
إثارة عواطف وحماس الشعوب لكي تتحرك وتأخذ موقف إيجابي وإقناعهم برسالة الاغنية لا أحد أبدا يقول إنها استارتيجية لإقناع خاطئة ولكن طريقة صياغة الرسالة التي يريدوا إيصالها للشعوب العربية من وجهة نظري كانت فاشلة جدا
فالناس عموما بتتأثروتقتنع أكثر عندما نحثهم علي سلوك ونعرض لهم مردود ونتيجة هذا السلوك لو فعلوه ه لكن الأغنية لم تعرض مثلا لو تحركت الشعوب ما شكل مصيرنا في المستقبل لو كانت عرضت ذلك كانت حمست الشباب وحركت الشعوب العربية لانه شايف نتيجة مشرقة للموقف الذي سيقوم به لكنها لم توضح إلا الضعف والهوان والذل العربي وبالتالي فشلت في إثارة حماس الكثير من الشعوب العربي
ده مجرد رأي
وبحترم جدااااااا وجهة نظرك يا وردة

من طرف alaa السبت مارس 29, 2008 12:57 pm

بشكرك علي المناقسة الرائعة فكرتها جديدة جدااااااا
أشكرك

من طرف وردة المنتدى السبت مارس 29, 2008 1:39 pm

شكرا يا الاء على رايك بس انا لقيت الناس كلها متاثرة بيها حتى المدرسين سيبين الحصص وقاعدين يتفرجوا عليها واصحابى كل اما اكلم واحدة فيهم الاقيها بتعيط عشان الاغنية بجد انا عارفة انها بتجيب اكتئاب بس هما فاكرين ان كده بيحركوا الشعوب لما يشوفوا اخوانهم بيحصل فيهم كده احنا لينا وجهة نظر وهما كمان ليهم وجهة نظرهم سواء صح او غلط
واختلاف الراى لا يفسد للود قضية

من طرف وردة المنتدى الأحد مارس 30, 2008 6:21 pm

مع احترامى لجميع الاراء انا سألت ناس كتير من اصحابى وقولتلهم الاراء دى بس كلهم قالوا ان الهدف من الاغنية
اصحاء ضماير الناس يمكن يقدروا يعملوا حاجة ومتشكرة على ردكم

من طرف lamis الإثنين أبريل 07, 2008 9:16 am

elo3'nya mo2sera law atfargt 3leha ya3ny elfelm elwth2ky hwa elly nag7 msh elo3'nya laken law sm3tha msh ha ttasar 5ales b3aks el7elm el3arby

تاثير اغنية الضمير العربى عليكم

تاثير اغنية الضمير العربى عليكم

رد: تاثير اغنية الضمير العربى عليكم

رد: تاثير اغنية الضمير العربى عليكم

رد: تاثير اغنية الضمير العربى عليكم

رد: تاثير اغنية الضمير العربى عليكم

رد: تاثير اغنية الضمير العربى عليكم

رد: تاثير اغنية الضمير العربى عليكم

رد: تاثير اغنية الضمير العربى عليكم

رد: تاثير اغنية الضمير العربى عليكم

رد: تاثير اغنية الضمير العربى عليكم

رد: تاثير اغنية الضمير العربى عليكم

رد: تاثير اغنية الضمير العربى عليكم

رد: تاثير اغنية الضمير العربى عليكم

رد: تاثير اغنية الضمير العربى عليكم

رد: تاثير اغنية الضمير العربى عليكم